Барлық жаңалықтар
IQ Ұрпақ: IT саласының болашақ мамандарына арналған жаңа олимпиада
iQ Solutions пен UIB IT, Big Data аналитикасы және Smart-технологияларға қызығатын мектеп оқушылары мен студенттерге арналған iQ Ұрпақ олимпиадасын өткізді.
IT-білім беру саласындағы жаңа бастама - iQ Solutions компаниясы Кенжеғали Сағадиев атындағы Халықаралық бизнес университетімен (UIB) бірлесіп ұйымдастырған iQ Ұрпақ олимпиадасы мектеп оқушылары мен студенттер арасында үлкен қызығушылық тудырды. Қатысуға елдің әр өңірінен, соның ішінде Тараз, Павлодар, Астана және Шымкент қалаларынан 250-ден астам өтінім түсті.
Олимпиаданың басты мақсаты - талантты жастарды қолдау, олардың әлеуетін ашу және IT мен инновациялар саласы үшін жаңа буын мамандарын даярлауға үлес қосу. Қатысушылар цифрлық экономиканың ең сұранысқа ие бағыттары бойынша тапсырмалар орындады: IT, Big Data аналитикасы және Smart-технологиялар.
Финалистер білім мен болашақ мансапты ұштастыру мүмкіндігіне ие болды. Жеңімпаздарға оқу ақысын қаржыландыру, білім беру бағдарламаларына жеңілдіктер және iQ Solutions компаниясында ақылы тағылымдамалар ұсынылды. Мұндай формат жастарға жаңа біліммен қатар, тәжірибелі мамандардың жетекшілігімен кәсіби ортада дамуға арналған нақты мансаптық жол береді.
Бұл бастама саланың өзекті мәселелеріне жауап береді. Қазақстанда білікті IT-мамандарға сұраныс жоғары, мектеп түлектері оқу құнының жоғары болуына байланысты технологиялық бағыттарды әрдайым таңдай бермейді, ал қабілетті оқушыларға қолдау мен мотивация қажет. Олимпиада осы сын-қатерлерге нақты жауап болып, мемлекеттің ғылым, білім және жасанды интеллектті дамытуға басымдық беретін стратегиялық бағытын көрсетеді.
Олимпиаданың ұйымдастырушысы - Қазақстандағы ірі жүйелік интеграторлардың бірі iQ Solutions. Компания нарықта 10 жыл жұмыс істеп келеді, SAP, бұлттық және индустриялық технологияларды енгізеді, бизнес-процестерді автоматтандырады және киберқауіпсіздік жобаларын дамытады. Оның серіктестері қатарында SAP, Microsoft және Siemens сияқты әлемдік көшбасшылар, ал клиенттері арасында мұнай-газ, қаржы және телекоммуникация салаларының ірі өкілдері бар.
«iQ Ұрпақ олимпиадасы - жастарға арналған аманатымыз. Біз талантты балаларды тек біліммен ғана емес, мансаптық мүмкіндіктермен де қолдауға ұмтыламыз. Біз үшін жаңа буынды білім мен ғылым ел дамуының қозғаушы күші екеніне шабыттандыру маңызды», - деді iQ Solutions компаниясы Бас директорының міндетін атқарушы Елена Пешая.
